May 28, 2011

ಕರೆಯದ ಮದುವೆಗೆ ಗೀತೆಯೊಂದು ಉಡುಗೊರೆ...

           ಈ ಹುಡುಗೀರೇ ಹೀಗಾ ? ಅವರ ಹೃದಯದಲ್ಲಿ ಸ್ನೇಹ ಎಂಬುದಕ್ಕೆ ಜಾಗವಿಲ್ಲವಾ !? ಅಥವಾ ಸ್ನೇಹ ಅವರಿಗೇ ಇಷ್ಟವಿರುವುದಿಲ್ಲವೋ ನಾತಿಳಿಯೆ. ನನ್ನ ಬಾಲ್ಯದ ಸ್ನೇಹಿತರೆಲ್ಲರೂ ಹೀಗೆ ಅನ್ನಿಸುತ್ತದೆ. ಅವರೆಲ್ಲರೂ ಆ ದಿನಗಳನ್ನು ಬಹುಷಃ ಮರೆತೇ ಬಿಟ್ಟಿರಬೇಕು ಅಥವಾ ನಂತರದ ದಿನಗಳಲ್ಲಿ ಅವರಿಗೆ ನೆನಪಿಸಿಕೊಳ್ಳಲು ಸಾಧ್ಯವಾಗಲಿಲ್ಲವಾ ? ಅದೇನೋ ನಾ ತಿಳಿಯೆ. ಈ ವೈಜ್ಞಾನಿಕ ಯುಗದಲ್ಲಿ ಅಪರಿಚಿತರೇ ಪರಿಚಿತರಾಗುವ ಸಮಯದಲ್ಲಿ, ಪರಿಚಿತರನ್ನು ಹುಡುಕುವುದು ನನಗೂ ಕಷ್ಟವಾಯಿತು. ಅದೇನೇ ಆಗಲಿ, ಅವರಿಗೆ ನನ್ನ ಪರಿಚಯವಿಲ್ಲವೋ, ನನ್ನ ಪರಿಚಯದ ನೆನೆಪಿದೆಯೋ ನಾ ಅರಿಯೆ. ಈ ಸಂದರ್ಭದಲ್ಲಿ ನನಗೆ ತಿಳಿಯಲ್ಪಟ್ಟಂತೆ ನನ್ನ ಸ್ನೇಹಿತೆಯೊಬ್ಬಳು ವಿವಾಹವಾಗುತ್ತಿದ್ದಾಳೆ. ನನ್ನನ್ನು ವಿವಾಹಕ್ಕೆ ಆಮಂತ್ರಿಸದಿರುವುದಕ್ಕೆ ನನಗೇನೂ ಬೇಸರವಿಲ್ಲ. ಆದರೆ ಅವಳಿಗೆ ವಿವಾಹ ಶುಭ ಕೋರದಿದ್ದರೆ ಆ ಗೆಳೆತನ ಸಾರ್ಥಕವಾಗಲಾರದು. ಹಾಗಾಗಿ ಅವಳಿಗೆ ಶುಭಕೋರುತ್ತ ಈ ಗೀತೆಯನ್ನು ಉಡುಗೊರೆಯಾಗಿ ನೀಡುತ್ತಿದ್ದೇನೆ.

 

ಹೇ ಗೆಳತೀ..,
 ನೀ ಮರೆತು ಹೋದೆಯಾ
 ನಮ್ಮ ಆ ದಿನದ ಸ್ನೇಹವಾ
ಮಾತು ಮೌನವಾಯಿತು
   ನೆನಪು ನೀ ಅಳಿಸಿಬಿಟ್ಟೆಯಾ

ಸ್ನೇಹ ನೆನಪಿಲ್ಲವೇ
ನಿನಗೆ, ಈ ಸ್ನೇಹ ಭಾರವೇ
ಮತ್ತೆ, ಅದೇಕೆ ನಾಚಿಕೆ
ನಮ್ಮ ಈ ಸ್ನೇಹ ಬೆಸುಗೆಗೆ

ಮನವು ನಲಿದಾಡಿತು
ನಿನ್ನ ಆ ಸ್ನೇಹದ ನೆನಪಿಗೆ
ಹೃದಯ ಶುಭ ಕೋರಿತು
ಗೆಳತೀ, ಈ ನಿನ್ನ ಮದುವೆಗೆ

ನಮ್ಮ ಸ್ನೇಹಕೋಸ್ಕರ
ನನ್ನ ಈ ಗೀತೆ ಕಾಣಿಕೆ
ಬದುಕು ಬಹುದೂರ ಸಾಗಲಿ
ನಿಮ್ಮ ಬಾಳು ಹಸನಾಗಲಿ

May 16, 2011

ಮಳೆಯಲಿ ನಿನ್ನ ಜೊತೆಯಲಿ..,,



ಇರುಳಲಿ ನಿನ್ನ ಜೊತೆಯಲಿ...
ನಾ ನೆನೆದೆನು ಇಂದು ಮಳೆಯಲಿ
ತಂಪು ನೀರಿನ ಚಳಿಯಲಿ...
ಪ್ರೇಮಾಂಕುರವು ಮನದಲಿ.

ತಂಗಾಳಿ ಬೀಸಿದ ಕ್ಷಣದಲಿ...
ನೀ ನಡೆದೆ ನನ್ನ ಜೊತೆಯಲಿ
ನಿನ್ನ ಸಂಗಡ ಮಳೆಯಲಿ...
ನನ್ನನೇ ಮರೆತೆ ನಿನ್ನ ಪ್ರೀತಿಲಿ.

ನನ್ನ ಮನವು ನಲಿದಿದೆ ಖುಷಿಯಲಿ...
ನೀನೆಂದೂ ಇರುವೆ ನನ್ನ ಕನಸಲಿ
ನಮ್ಮ ಪ್ರೀತಿಯ ಬೆಸುಗೆ ಮಳೆಯಲಿ...
ಚಂದಿರನೆ ಸಾಕ್ಷಿ ಇರುಳಲಿ.
 
 ** ಈ ಸಾಲುಗಳನ್ನು ಬರೆಯಲು ನನಗೆ ಸಲಹೆಯನ್ನಿತ್ತ ನನ್ನ ಗೆಳತಿಗೆ ಅರ್ಪಣೆ.

May 15, 2011

ಅವಳನ್ನೇ ನೆನೆದು..,,


 
ನಾ ಬರೆದೆನು ಕವನ
ಅವಳನ್ನೇ ನೆನೆದು
ಅವಳಿಗಿಷ್ಟವೆಂದು
ನನ್ನ ಕನಸನ್ನೇ ಮರೆತು.

ಓದಿದಳೊಂದುದಿನ
ನನ್ನ ಕನಸಿನ ಕವನವ
ನಕ್ಕು ಖುಷಿಯಿಂದ ಹೇಳಿದಳು
ನಿನ್ನ ಕವನವು ಸುಂದರ.

ನಕ್ಕು ಖುಷಿಯಾದೆ ನಾ
ಅವಳ ನಗುವಿಗೆ
ಬರೆದೆ ಇನ್ನೊಂದಿಷ್ಟು ಕವನ
ನನ್ನವಳ ಪ್ರೀತಿಗೆ.!

May 10, 2011

ಹೀಗೊಂದು ಪ್ರೇಮ ಪತ್ರ..,,


ನಿನ್ನ ನಗು ನನ್ನ ಕಣ್ಣಂಚಲಿ
ನಿನ್ನ ಮಾತು ನನ್ನ ಮನದಾಳದಿ
ನಿನ್ನ ನೆನಪೊಂದೆ ಸಾಕು ನನ್ನ ಈ ಜೀವಕೆ
ನಿನ್ನ ಮನಸೊಮ್ಮೆ ಕೊಡು ನನ್ನ ಈ ಪ್ರೀತಿಗೆ !

ನಿನ್ನ ಕಂಡಾಕ್ಷಣ
ಪ್ರೀತಿ ಚಿಗುರೊಡೆಯಿತು
ಮನದ ಆ ಕಂಪನ
ನಿನಗೆ ತಿಳಿಯದೇ ಹೋಯಿತು..!

ಮೌನ ನೋವಿಗೆ ಕಾರಣ
ಹೃದಯ ನಗುವಿಗೆ ಕಾತುರ
ನಿನ್ನ ಕನಸಿಗೆ ನಾನು ಹೆಗಲಾಗುವೆ
ನನ್ನ ಪ್ರೀತಿಯ ನೀನು ಸ್ವೀಕರಿಸು ಬಾ..!

March 16, 2011

ಸೌಂದರ್ಯ


ಅದೊಂದು ಮುಂಜಾವು. ಮೈಕೊರೆಯುವ ಚಳಿ. ಸುತ್ತಲೂ ಮಂಜು ಕವಿದ ವಾತಾವರಣ. ಆ ತಿಳಿ ಮುಂಜಾವಿನಲ್ಲಿ ನನ್ನದೊಂದು ವಾಯುವಿಹಾರ. ಸುತ್ತಲಿನ ಪರಿಸರದಲ್ಲಿ ಆ ದಿನ ಅದೇನೋ ಹೊಸತನ. ಗೆಳೆಯನ ಮುಖ ಸ್ಪಷ್ಟವಾಗಿ ಕಾಣದಿದ್ದರೂ ಅವನೊಂದಿಗಿನ ಮುಂಜಾನೆಯ ಹರಟೆ ಮಜವಾಗಿತ್ತು ! ದಾರಿಯುದ್ದಕ್ಕೂ ಅದೆಷ್ಟೋ ಜನರು ವಾಯುವಿಹಾರಕ್ಕೆ ಬಂದಿದ್ದರು. ಹೀಗೆ ಸಾಗಿದ ದಾರಿಯಲ್ಲಿ ನನಗೆ ಕಂಡಿದ್ದು ಅವಳ ಸುಂದರ ನಗುಮೊಗ. ಅವಳ ಮುಖದಲ್ಲಿ ಅದೇನೋ ಕಾಂತಿ, ತೇಜಸ್ಸು !!  ನನಗರಿವಿಲ್ಲದೇ ನನ್ನ ಮನಸ್ಸು ಅತ್ತ ಕಡೆ ಸರಿದಿತ್ತು.  ಆ ಮಂಜಿನಲ್ಲೂ ಅವಳ ಮುಖ ಸ್ಪಷ್ಟವಾಗಿ ಕಾಣಿಸುತ್ತಿತ್ತು. ಹಾಗೆ ಸಾಗಿದ ನಮ್ಮ ವಿಹಾರ ಅವಳಿಂದ ಬಹು ದೂರ ಸರಿದಿತ್ತು. ಹಿಂದಿರುಗಿ ಬಂದಾಗ ಅವಳು ಮಾಯವಾಗಿದ್ದಳು. ಆ ಮುಂಜಾನೆಯ ಮಂಜಿನಲ್ಲಿ ಕಂಡ ಸೌಂದರ್ಯವನ್ನು ಹುಡುಕುತ್ತಾ. . . . .

ನಿನ್ನ ನೋಡಿದ ಆ ಕ್ಷಣ
ಮನವಾಯ್ತು ಹರುಷ ಈ ದಿನ
ಆ ಕ್ಷಣ ಕಂಡ ನಗುಮೊಗ
ಅಚ್ಚಾಯ್ತು ಹೃದಯದಿ ಸುಂದರ !
 
ಬರೆದೆ ನಿನಗೋಸ್ಕರ ನಾ
ನನ್ನ ಕನಸಿನ ಈ ಪ್ರೇಮವಾ
ಮುಡುಪಾಗಿ ಇಟ್ಟಿರುವೆ ನಾ
ನನ್ನ ಹೃದಯವ ನಿನಗೋಸ್ಕರ !

ಕಾದಿರುವೆ ನಿನಗೋಸ್ಕರ ನಾ
ಈ ಪ್ರೀತಿಯ ಮಾರ್ಗದಿ
ನೀ ಬಂದು ಸಂತೈಸು
ನನ್ನ ಈ ಮನದ ಪ್ರೀತಿನಾ !

February 27, 2011

ಸ್ವಪ್ನ

 ಆಕಸ್ಮಿಕವಾಗಿ  (ಅ)ಪರಿಚಿತರು ಎದುರಿಗೆ ಬಂದರೆ ಏನು ಮಾಡುವುದು ? ಒಂದು ಕಾಲದಲ್ಲಿ ಒಟ್ಟಾಗಿ ಆಡಿ ಕುಣಿದ ಬಾಲ್ಯದ ಸ್ನೇಹಿತೆಯೊಬ್ಬಳು ಆಕಸ್ಮಿಕವಾಗಿ ದೊರೆಯುತ್ತಾಳೆ. ತನ್ನನ್ನು ಪರಿಚಯಿಸಿಕೊಂಡು, ನಾನೇ ಅವಳ ಬಾಲ್ಯದ ಗೆಳೆಯನಿರಬೇಕೆಂದು ಊಹಿಸಿ ಜೊತೆಯಲ್ಲಿರುವ ಒಂದು ಫ಼ೋಟೊ ತೋರಿಸಿದಾಗ ನನಗೆ ಅಚ್ಚರಿ ! ಆಶ್ಚರ್ಯ !! ಎದುರಿಗಿರುವವಳು ನನ್ನ ಬಾಲ್ಯದ ಸ್ನೇಹಿತೆ ! ಯಾವುದೋ ಕಾರಣಗಳಿಂದ ದೂರವಾದ ಆ ಸ್ನೇಹ ಇಂದು ಜೊತೆಯಾಗಿದೆ. ಅವಳಲ್ಲಿ ಮನಬಿಚ್ಚಿ ಮಾತನಾಡಬೇಕೆಂಬ ಬಯಕೆ. ಆದರೆ ತನ್ನ ಹೆಸರು ಭವ್ಯ ಎಂದಷ್ಟೇ ಪರಿಚಯಿಸಿಕೊಂಡ  ಅವಳ ಜೊತೆಯೊಂದಿಗಿನ ಸ್ನೇಹ ಕೇವಲ ಕ್ಷಣಿಕವಾಗಿತ್ತು. ಯಾವುದೋ ಕಾರಣಗಳಿಂದ ನನಗೆ ನಿದ್ದೆಯಿಂದ ಎಚ್ಚರವಾಗಿತ್ತು. ಕ್ಷಣದಲ್ಲಿ ಮಾಯವಾದ ಅವಳಲ್ಲಿ, ಪ್ರೀತಿಯ ಕನಸು ಚಿಗುರಿತ್ತು. ಅವಳನ್ನೇ ನೆನೆಯುತ್ತ ಅವಳಿಗೋಸ್ಕರ. . . . . 



ಬರೆದೆ ನೀನು ಪ್ರೇಮ ಗೀತೆ
ನನ್ನ ಹೃದಯ ಪಟಲದಿ
ನಿನ್ನ ಮನದ ಮಾತು ಕೇಳಿ
ಬೆಳಗಿತೀದಿನ ಹರುಷದಿ

ಕರುಣಿ ನೀನು, ಮೌನಿ ನೀನು
ನನ್ನ ಸೆಳೆದೆ ಪ್ರೀತಿಗೆ
ನಿನ್ನ ಮನದ ಮಾತು ಕೇಳಿ
ಕರಗಿತೀಮನ ಹರುಷದಿ

ಕನಸಿನಲ್ಲೂ ನನಸಿನಲ್ಲೂ
ನಿನ್ನ ರೂಪ ಕಲ್ಪನೆ
ಕನಸಿನ ಈ ಕಾವ್ಯದಲ್ಲಿ
ನಿನ್ನದೇ ವರ್ಣನೆ

ಕನಸಿನಲ್ಲೇ ನಿನ್ನ ನೋಡಿ
ಸೋತೆ ನಿನ್ನ ರೂಪಕೆ
ನಿನ್ನ ಭವ್ಯ ರೂಪ ನೋಡಿ
ಮಿಡಿದೆ ನಿನ್ನ ಪ್ರೀತಿಗೆ.